Mar as trice, chan eil ach aon adhbhar ann airson meanbh-rathaidean-iarainn: spòrs!
Ach tha rathad-iarainn no dhà ann a tha a’ dèanamh rudan feumail. Tha beagan ann a tha a’ toirt seachad seirbheis còmhdhail phoblach mar an Ravenglass and Eskdale ann an Cumbria.
Agus tha loidhne no dhà ann a tha gan cleachdadh airson bathair.
Chunnaic mi tè dhiubh sin ann an Siorrachd York bho chionn goirid: Rathad-iarainn Wolds Way Lavender faisg air Malton.
Rathad-iarainn Wolds Way Lavender
Tha an rathad-iarainn ga chleachdadh gus lus na tùise a thoirt a-steach dhan taigh-staile far am bi iad a’ dèanamh ola lus na tùise airson a dhol ann an siabann, siampù agus mar sin air adhart.
A bharrachd air an obair chruaidh seo, tha an trèana a’ toirt seachad tursan do luchd-turais. Is e tuathanas sgoinneil a tha seo le flùraichean gu leòr, obraichean ealain, lochan, eòin gu leòr, craobhan, dealain-dè agus gu leòr lus na tùise!
Tha trèana diesel bheag phurpaidh ann agus thathar a’ togail loco smùid cuideachd. ‘S e deagh àite a tha seo agus mholainn gu mòr e.
Alasdair
Trèanaichean, tramaichean is tràilidhean 