Tha tòrr air a bhith sna pàipearan bho chionn goirid mun teaghlach san Leargaidh Ghallda a bhuannaich £160M anns a’ Chrannchur.
Nam biodh airgead mar sin agam, thogainn rathad-iarann sa ghàrradh. A rèir coltais, ge-tà, tha cuideigin ann an Alba air sin a dhèanamh mar-thà!
Chunnaic mi dealbh de stèisean Saughtree ann an Siorrachd Rosbroig sna Crìochan air Flickr bho chionn bliadhna no dhà – taigh-stèisein a bha cuideigin air ceannach agus air trac a chur sìos agus shunter is carabad no dhà a chur ann!
Ged a bha fios agam gun robh an t-àite ann, ge-tà, bha fios agam gum biodh e gu math doirbh a lorg, gu h-àraid le fìor dhroch uisge is tairneanach is dealanach ann mar a bha Didòmhnaich.
Bha an rathad gu Whitrope gu math cugallach ach bha seo – am B6357 – na bu mhiosa buileach ach ged nach robh e furasta, rinn sinn a’ chuis. Tha an stèisean taobh a-muigh baile Saughtree agus air mullach cnoc àrd. Cha robh sgeul air bhon rathad gun robh rathad-iarainn air a bhith ann riamh idir ach a-mhàin gun robh bothan beag ann.
Stèisean Saughtree, Schd Rosbroig
Bha an stèisean seo, a tha dìreach dà mhìle air falbh bhon chrìch le Sasainn, air Borders Counties Railway a bha eadar Riccarton Junction air Slighe a’ Waverley ann an Alba agus Hexham ann an Northumbria. Dhùin an stèisean do luchd-siubhail ann an 1956 agus do bhathar ann an 1958.
Tha àrd-ùrlar agus togalach an stèisean a’ coimhead nas fheàrr na bha iad nuair a bha iad fhathast fosgailte agus tha an duine aig a bheil an taigh air mu 400 slat de thrac a chur sìos cho math ri seada-einnsein.
Chan eil fhios agam cho tric sa bhios treanaichean a’ ruith an seo agus chan eil mi a’ smaoineachadh gum bi an rathad-iarainn fosgailte don t-sluagh co-dhiù ach bha e sgoinneil fhaicinn co-dhiù!
Seada-einnsein, Saughtree
Trèanaichean, tramaichean is tràilidhean 
Pingback: Trèanaichean Mickey Mouse – Oh boy! #gàidhlig | Trèanaichean, tramaichean is tràilidhean