Saorsa do Wessex! – Turas gu Vectis (2) #gaidhlig #IOW #islandline

Chaidh mi gu Eilean Wight bho chionn seachdain airson taistealachd rèile.’S e turas sònraichte a bha seo dhomhsa oir tha mi fhèin is Jenny an dùil ri leanabh anns a’ Chèitean agus cha bhi tìde – no airgead – gu leòr agam airson tursan rèile mòra fada mar seo airson iomadh bliadhna eile.

Thachair an turas dìreach dà latha às dèidh mo cho-latha-breith agus thug Jenny dhomh fìor dheagh phreasant – mapa OS den Eilean agus rinn Ciorstaidh cèicean bruic dhomh. Leis a’ mhapa agus cèic no dhà, rinn mi air Stèisean a’ Mheadhain oidhche Haoine gus an trèana oidhche gu Lunnainn a ghlacadh.

 

Eilean Wight

Eilean Wight

Às dèidh oidhche gun cus cadail (cha robh leabaidh agam – dìreach cathair), rinn mi air Waterloo airson na trèana gu Portsmouth le cofaidh làidir agus deagh leabhar.

Air an t-slighe ann, chaidh sinn tro Eastleigh far an robh fo-thaghadh Westminster ann bho chionn goirid. Tron iomairt, bha na meadhanan a-mach air na Tòraidhean is na Lib-Deamaich ach cha robh ach aon cheist agamsa – ciamar a dhèanadh na Wessex Regionalists? Seo pàrtaidh beag a tha ag iarraidh tomhas de dh’fhèin-riaghladh airson na seann rìoghachd seo ann an iar-dheas Shasainn. Tha cuimhne agam nuair a bha mi nam bhalach bheag, gum biodh m’ athair – aig an robh ùidh ann an gluasadan poilitigeach beaga – a’ faighinn cuairt-litrichean bhuapa le dràgon, samhla Wessex air a’ chòmhdach. Aig a’ cheann thall, fhuair iad dìreach 30 bhòt is mar sin, tha e coltach gum bi greis ann mus bi Seanadh Wessex againn!

Ach cha robh tìde gu leòr agam smaoineachadh mu phoileataigs oir air an latha sin, bha mi gu bhith a’ dèanamh dà dhiofar rud a bh’ air an “liosta-bucaid” agam. Chan e a-mhàin gum bithinn a’ dol gu Eilean Wight is a’ faicinn nan trèanaichean ach gum bithinn cuideachd a’ dol ann air bàta-foluaimein (hovercraft).

Nuair a chaidh mi air bòrd a’ bhàta, chuir e iongnadh orm cho coltach sa bha an taobh a-staigh ri aiseag Dhùn Obhainn. Nuair a thoisich an einnsein ge-tà, chuir e iongnadh orm dìreach cho buileach eu-coltach sa bha e ri aiseag sam bith a chunnaic mi riamh! Cha do mhair an turas againn ach 10 mionaidean ged a mhaireas an turas bàta còrr is leth-uair a thìde agus bha e mar a bhith air bòrd bàta-aiseig beag aig CalMac a bha a’ dol cho luath ri speedboat ann an rèis. Cha b’ urrainn dhomh creidsinn cho luath sa bha am bàta-foluaimein. Nach fhaigh sinn hovercraft airson Malaig-Armadal cuideachd latha de na làithean?

 

Bàta-foluaimein – ach càite bheil na h-easgannan?

Ri leantainn…

Alasdair

An turas air fad agam:

GLC-EUS, EUS-WAT (London Underground), WAT-PMS, Southsea-Ryde (bàta-foluaimein), RYP-SHN (agus iomadh turas eile air loidhne an eilean air adhart is air ais fad an latha!)

Air m’ i-pod: The Clash. Dh’èist mi a ris a h-uile càil a chlàraich iad riamh – dà thuras – air an trèana oidhche ach a-mhàin an clàr Sandinista a chionn ’s gu bheil e air leth fhèin dona! 8/10.

An leabhar agam: Tower – an epic history of the tower of London. 9/10. Fìor dheagh leabhar eachdraidh.

About alasdairmaccaluim

Eadar-theangair, neach-leasachaidh cànain, neach-iomairt Gàidhlig, sgrìobhadair, rocair agus droch chluicheadair beus.
Chaidh seo a phostadh ann an rathaidean-iarainn agus a thagadh , , . Dèan comharra-lìn dhen bhuan-cheangal.

1 fhreagairt ri Saorsa do Wessex! – Turas gu Vectis (2) #gaidhlig #IOW #islandline

  1. Pingback: Sàbhail Rathad-iarainn an Eilein! #gàidhlig #IOW | Trèanaichean, tramaichean is tràilidhean

Fàg freagairt

Cuir a-steach am fiosrachadh agad gu h-ìosal no briog air ìomhaigheag gus clàradh a-steach:

WordPress.com Logo

Tha thu a' toirt seachad beachdan leis a' chunntas WordPress.com agad. Log Out / Atharraich )

Dealbh Twitter

Tha thu a' toirt seachad beachdan leis a' chunntas Twitter agad. Log Out / Atharraich )

Facebook photo

Tha thu a' toirt seachad beachdan leis a' chunntas Facebook agad. Log Out / Atharraich )

Dealbh Google+

Tha thu a' toirt seachad beachdan leis a' chunntas Google+ agad. Log Out / Atharraich )

Connecting to %s