Chaidh mi fhèin is mo dheagh charaid Wilson MacLeòid a-mach airson deochag a-raoir: deochag rud beag eadar-dhealaichte bhon àbhaist. Tha na tramaichean ùra an Dùn Èideann fo dheuchainn an-dràsta agus bha sinn airson a dhol gu pinnt ann an àite far am b’urrainn dhuinn beagan spotadh-thramaichean a dhèanamh.
An fhèineag a bu mhiosa a chaidh a thogail riamh!
Às dèidh beagan rannsachaidh, thagh sinn Tiles air Cearnag Naomh Anndrais far a bheil deagh shealladh ri fhaighinn de na tramaichean.
Tiles: Deagh shealladh den t-slighe-trama
Bha cairteal na h-uaireach ann mus do nochd a’ chiad trama ach thachair mìorbhail fhad’s a bha sinn a’ feitheimh – lorg Wilson criosp air an robh coltas Iosa!
Criospa le coltas Iosa!
Feumaidh gun robh sin na dheagh chomharra oir mionaid no dhà as dèidh sin, chunnaic sinn a’ chiad trama den oidhche. Bha e gu sònraichte math a bhith a’ suidhe an sin a’ coimhead air na tramaichean a’ dol seachad agus ag òl pinnt aig an aon àm.
Trama Dhùn Èideann aig Sràid a’ Phrionnsa/Cearnag Naomh Anndrais
Tha deagh choltas air na tramaichean ùra – spaideil, snasail agus luath agus tha mi a’ dèanamh fiughair ri tòiseach nan seirbheisean poblach air an ath-mhìos.
Alasdair
Trèanaichean, tramaichean is tràilidhean 