An rathad-iarainn as giorra air a’ Ghàidhealtachd #gaidhlig

Is iomadh rathad-iarainn a chunnaic mi ri mo latha is ri mo linn ach cha robh gin aca cho annasach ris an fhear a chunnaic mi ri taobh stèisean Raoghaird (Rogart – ROG) air Loidhne a’ Chinn a Tuath bho chionn goirid.

Mhothaich mi bliadhnaichean air ais gun robh shunter beag anns a’ ghàrradh aig ostail Sleeperzzz aig seann togalach an stèisein anns a’ cheàrnaidh iomallach seo de Chataibh ach cha do thuig mi idir gun robh trac ann cuideachd.

Shunter aig Stèisean Sgìre Raoird

Tha mi air a bhith ag obair air prògram do BhBC Alba mu rathaidean-iarainn air a’ Ghàidhealtachd agus mar phàirt de seo, bha cothrom agam agallamh a dhèanamh leis an eòlaiche còmhdhail Frank Roach a tha ag obair aig HITRANS agus a tha mion-eòlach air loidhne a’ Chinn a Tuath. ‘S ann le Frank agus a bhean Ceit a tha Sleeperzzz cuideachd agus mar sin, dh’fhaighnich mi dha mun t-shunter aige.

“O, tha e ag obrachadh”, arsa e, “agus tha loidhne ghoirid ann cuideachd!” Ma thig sibh dhan taigh agam feasgar, tòisichidh mi an loco dhuibh!”

Bha sinn a’ filmeadh aig Snaidhm Georgemas (Georgemas Junction – GGJ), an ceann-rèile (junction) as fhaide a tuath anns an RA. Dh’fhaighnich mi dha dè an ceann-rèile as fhaide a deas. “St Erth Junction sa Chòrn” thuirt e, “agus ‘s ann a dh’fhas mi suas gu math faisg air”. Abair gaisgeach – tha trèana sa ghàrradh aige agus ‘s e Còrnach a th’ ann cuideachd. Dè cho cool sa tha sin!

Nuair a bha sinn deiseil ann an Gallaibh, rinn sinn air Raoghard agus air taigh Frank, far am faca sinn gun robh an shunter beag air tòiseachadh ceart gu leòr.

Tha an Rogart Railway dìreach mu 30 slat a dh’fhaid ach fhuair mi cothrom an shunter (air a bheil Dòmhnall mar ainm!) a dhràibheadh agus chòrd e rium glan. Fhuair mi tiocaid cuideachd.

Turas rèile mòr an t-saoghail! #gaidhlig #raoghard #rogart

‘S e fìor dheagh àite a th’ ann an Sleeperzzz – seann choidsichean rèile agus seann bhus a chaidh a sgeadachadh mar àiteachan fuirich. Tha iad gu math snog agus tha Mìcheal Portillo fhèin – rìgh nan rathaidean-iarainn – air fuireach ann.

Rathad-iarainn Raoghard, Cataibh

Nuair a bhios beagan airgid agam, nì mi an aon rud agus togaidh mi mo rathad-iarainn fhèin nam ghàrradh.

Alasdair

About alasdairmaccaluim

Eadar-theangair, neach-leasachaidh cànain, neach-iomairt Gàidhlig, sgrìobhadair, rocair agus droch chluicheadair beus.
Chaidh seo a phostadh ann an Uncategorized agus a thagadh , , , , , . Dèan comharra-lìn dhen bhuan-cheangal.

1 fhreagairt ri An rathad-iarainn as giorra air a’ Ghàidhealtachd #gaidhlig

  1. Thuirt Tuairisceoir:

    Reblogged this on An Tuairisceoir.

    Liked by 1 duine

Fàg freagairt

Cuir a-steach am fiosrachadh agad gu h-ìosal no briog air ìomhaigheag gus clàradh a-steach:

WordPress.com Logo

Tha thu a' toirt seachad beachdan leis a' chunntas WordPress.com agad. Log Out / Atharraich )

Dealbh Twitter

Tha thu a' toirt seachad beachdan leis a' chunntas Twitter agad. Log Out / Atharraich )

Facebook photo

Tha thu a' toirt seachad beachdan leis a' chunntas Facebook agad. Log Out / Atharraich )

Dealbh Google+

Tha thu a' toirt seachad beachdan leis a' chunntas Google+ agad. Log Out / Atharraich )

Connecting to %s