Sgrìobh mi mun turas agam air an Heathrow Express bho chionn goirid. Trèana gu math luath is gu math spaideil ach gu math daor cuideachd.
Mura cur thu tiocaidean air dòigh co-dhiù 14 latha ro làimh, cosgaidh e £22 no £30 (1st) airson turas 15 mìle a mhaireas 15 mìonaidean.
An Heathrow Express, Paddington (PAD)
Fhuair mi tiocaid 1d clas airson faicinn cò ris a bhiodh e coltach. Tha suidheachan singilte gu math spaideil mòr agad agus wifi agus tha irisean agus pàipearan saor is an-asgaidh ann. (Ach ’s e an Financial Times a bh’ ann – b’ fheàrr leam an Guardian no rudeigin mar sin).
Bha e luath is chòrd an turas rium. Airson £30 ge-tà, tha mi a-smaoineachadh gum bu chòir dhut cofaidh fhaighinn cuideachd – ach is dòcha nach biodh an tìde aca an coire a ghoil san tìde a tha an trèana a’ toirt!
An Shuttle eadar Tèirmineal 4 agus Heathrow Meadhain
Nis, aig a’ phort-adhair, tha an Express a’ dol gu Heathrow Meadhain (Tèirmineal 2,3,4) agus an uair sin gu Tèirmineal 5. Ma tha thu airson a dhol gu Tèirmineal 4, tha trèana shuttle ann eadar Heathrow Meadhan is Tèirmineal 4. Tha na trèanaichean eadar na teirminealan saor is an-asgaidh.
Mur eil £30 agad, tha trèana eile ann a tha a’ toirt 30 mionaidean agus a tha a’ stad aig stèisean no dhà eile air an t-slighe. Sin an Heathrow Connect.
Tha roghainn eile ann cuideachd – an tiùb. Tha loidhne a’ Phiccadilly a’ toirt mu uair a thìde do mheadhan a’ bhaile ach tha e gu math gu math saor!
Chaidh mi ann air an Heathrow Express air £30 agus air ais air an Underground air £3.10!
Smaoinich – tha roghainn de thrì sheirbheisean rèile dhan Phort-adhair ma tha thu a’ dol gu Heathrow ach tha sinn fhathast a’ feitheimh ri seirbheis trèana sam bith gu Port-adhairt Ghlaschu. Tàmailteach!
Trèana Loidhne a’ Phiccadilly aig Heathrow T5
Trèanaichean, tramaichean is tràilidhean 