An ròd-rèiliche – bus a bha a’ smaoineachadh gun robh e na thrèana! #gàidhlig #gaelic

Tha mi air a bhith a’ sgrìobhadh tòrr mu thrèanaichean neònach an seo bho chionn goirid – am Bun-os-cionn Bahn, Bennie’s Railplane is eile. Leugh mi artaigil gu math inntinneach san Railway Magazine bho chionn goirid mu thrèana annasach eile – an Ro-railer no ròd-rèiliche sa Ghàidhlig.

Dè idir a th’ ann an ròd-rèiliche?

Tha an t-ainm a’ tighinn bho road-railer, carbad a tha comasach air ruith an dà cuid air an rathad agus air rathad-iarainn. Tha e coltach ri bus a tha cuideachd na thrèana!

ro-railer

Chaidh deuchainnean a dhèanamh le ro-rèilichean anns na 1930s leis an LMS ach do mhair na ro-rèilichean fada.

Rinn muinntir na Gearmailt deuchainn leis an ròd-rèiliche no Schienen-Straßen-Omnibus anns na 1950an cuideachd.

Ann am prionnsabal, ’s e deagh bheachd a th’ annta. Tha iad feumail airson sgìrean dùthchail far nach biodh trèana mhòr a dhìth agus far a bheil an stèisean gu tric pios air falbh bhon bhaile, no far a bheil an sluagh aig ceann na loidhne sgaipte. Bhiodh an trèana a’ ruith gu deireadh na loidhne is an uair sin, a’ ruith mun cuairt na sgìre mar bhus. Tha e cuideachd a’ posadh cunbhalachd is riaghailteachd an rathad-iarainn ri sùbailteachd nam busaichean.

Carson nach eil ro-rèilichan cumanta ma tha?

Ged is e deagh choincheap a th’ annta, tha an ròd-rèiliche caran doirbh a chur ann an gnìomh gu prataigeach air na h-adhbharan a leanas:

  • Chan eil mòran rùm air carbad mar seo agus mar sin, nan robh fèill mhòr air an t-seirbheis seo, cha bhiodh dòigh ann gus a leudachadh.
  • Feumaidh an ròd-rèiliche a bhith beag gu leòr airson a dhol air an rathad agus a bhith a rèir riaghailtean meud is sàbhailteachd an rathaid. Mar sin, dh’fheumadh e a bhith nas lugha is nas laige na trèana àbhaisteach.
  • Feumaidh an ròd-rèiliche a bhith a rèir riaghailtean meud is sàbhailteachd an rathaid-iarainn agus comasach air a bhith a’ ruith air an aon loidhne ri trèanaichean àbhaisteach . Mar sin, feumaidh e a bhith nas motha is nas trèasa na bus gus nach tèid pronnagan a dhèanamh dheth ma thèid a bhualadh le trèana guail no trèana express.
  • Bidh busaichean a’ togail dhaoine bho ìre an rathaid ach bidh trèanaichean a’ togail dhaoine bho àrd-ùrlaran is mar sin, dh’ fheumadh e a bhith comasach air an dà chuid a chleachdadh.
  • Tha cosgaisean mòra an lùib obair dealbhachaidh is togail airson charbadan mar seo. Gu mì-fhortanach, tha carbadan mar seo ag amas air loidhnichean beaga a tha mar as trice a’ call airgid agus far nach eil companaidhean rèile deònach airgead mòr a chosg. Air rathaidean-iarainn dùthchail, mar as trice, ’s e na ‘hand-me-downs’ bho loidhnichean eile a gheibh iad.
  • A bharrachd air na cosgaisean sin, tha cosgaisean àrda ann airson luchd-obrach na rèile – tha dràibhearan trèana a’ cosg an dà uiread ri dràibhearan bus agus bhiodh feum air geàrd cuideachd.

Tha seo a’ ciallachadh gum biodh e na b’ fhasa is na bu shaoire bus a ruith a tha a’ coinneachadh ris an trèana aig deireadh na loidhne le siostam thiocaidean a tha a’ gabhail a-steach an dà chuid.

Is dòcha nach eil e na iongnadh nach do dh’obraich an ròd-rèiliche ach tha e na iongnadh nach eil co-obrachadh ann eadar bus is trèana mar is còir.

Alasdair

 

About alasdairmaccaluim

Eadar-theangair, neach-leasachaidh cànain, neach-iomairt Gàidhlig, sgrìobhadair, rocair agus droch chluicheadair beus.
Chaidh seo a phostadh ann an busaichean, rathaidean-iarainn, Rathaidean-iarainn neo-àbhaisteach, Uncategorized agus a thagadh , , . Dèan comharra-lìn dhen bhuan-cheangal.

Fàg freagairt

Cuir a-steach am fiosrachadh agad gu h-ìosal no briog air ìomhaigheag gus clàradh a-steach:

WordPress.com Logo

Tha thu a' toirt seachad beachdan leis a' chunntas WordPress.com agad. Log Out /  Atharraich )

Dealbh Google+

Tha thu a' toirt seachad beachdan leis a' chunntas Google+ agad. Log Out /  Atharraich )

Dealbh Twitter

Tha thu a' toirt seachad beachdan leis a' chunntas Twitter agad. Log Out /  Atharraich )

Facebook photo

Tha thu a' toirt seachad beachdan leis a' chunntas Facebook agad. Log Out /  Atharraich )

Connecting to %s