Chan eil an London Underground dìreach a’ frithealadh Lunnainn fhèin – tha cuid de na loidhnichean a’ dol a-steach gu Essex, Hertfordshire agus fiù ’s Buckinghamshire.
An t-seachdain seo, ge-tà, bidh trèanaichean an tiùb a’ ruigsinn Bo’ness ann an Lodainn an Iar far a bheil trèana an Underground a’ tighinn gu Bo’ness airson deuchainnean.
Dh’aithris mi an seo bho chionn goirid mun D-train – suas-chuairteachadh no upcycling de sheann trèanaichean D-stock bhon London Underground gus trèanaichean ùra a thogail a tha gu math saor is gu math uaine. Tha a’ Chuimrigh gu bhith a’ ceannach cuid aca le einnseinean dìosail.
Tha Vivarail, a’ chompanaidh a tha a’ dèanamh nan trèanaichean-D cuideachd air tionndadh dealanach den trèana a thogail, a tha a’ cleachdadh bataraidhean.
Tha iad an dùil gun gabh an trèana seo a chleachdadh gus seirbheisean rèile a ruith air slighean nach eil air an dealanachadh. Tha iad gu sònraichte feumail airson sgìrean bailteil airson loidhnichean caran goirid ann an àiteachan far a bheil trioblaidean le truilleadh san adhair – agus tha Vivarail airson cuid aca a reic gu Riaghaltas na h-Alba. Bhiodh iad gu sònraichte freagarrach airson loidhnichean Cnoc Màiri, Chille Bhrìghde an Ear agus Cnoc a’ Bharra (Barrheid) ann am mòr-sgìre Ghlaschu.
Tha an D-trèana bataraidh ann am Bo’ness an t-seachdain seo agus bidh iad a’ toirt tursan dhan phoball saor is an-asgaidh. Tha mi a’ dol a dhol ann Dihaoine gus turas fhaighinn air a’ chiad trèana bataraidh ann an Alba bhon Sputnik a bhoidh a ruith eadar Obar Dheathain agus Bealadair air ais anns na 1960an!
Alasdair
Trèanaichean, tramaichean is tràilidhean 