Iomairt airson soidhnichean #Gàidhlig air Subway Ghlaschu

Dè an rathad-iarainn a bhios an àireamh as motha de luchd na Gàidhlig is luchd-ionnsachaidh na Gàidhlig a’ cleachdadh gach latha?

Chan eil fhios agam le cinnt, ach chanainn gur e Subway Ghlaschu a th’ ann.

Agus ’s e Subway Ghlaschu an t-aon àite ann an Alba far nach eil soidhnichean dà-chànanach air na stèiseanan (uill, sin agus Glaschu Mheadhain – ach sin iomairt airson latha eile!)

Mar sin, tha a’ bhuidheann Misneachd air iomairt a chur air dòigh gus an suidheachadh seo a chur ceart.

Sgrìobh iad an toiseach gu Com-pàirteachas Còmhdhail Shrath Chluaidh (Strathclyde Partnership for Transport – SPT) ach cha robh an fhreagairt aca uamhasach taiceil.

Ach tha SPT na ùghdarras poblach fo Achd na Gàidhlig (Alba) 2005 agus mar sin, faodaidh Bòrd na Gàidhlig iarraidh orra plana Gàidhlig ullachadh.

Air an adhbhar seo, tha Misneachd a’ cur athchuinge gu Bòrd na Gàidhlig ag iarraidh orra toirt air SPT plana Gàidhlig ullachadh. Fo Achd na Gàidhlig, feumaidh Bòrd na Gàidhlig feart a thoirt air tagradh sam bith a gheibh iad bhon phoball nuair a tha iad a’ co-dhùnadh dè na buidhnean poblach a bu chòir planaichean Gàidhlig ullachadh. Ma chuireas gu leòr dhaoine an ainmean ri seo, tha mi cinnteach gun èist am Bòrd ruinn.

Mapa a rinn Misneachd anns a ‘Ghàidhlig

Chan e dìreach an Subway a bu choir a bhith anns a’ phlana – tha stèiseanan bus aca cuideachd a’ gabhail a-steach Stèisean Bus Bhochanan – am stèisean bus as motha ann an Alba.

Ma tha thu airson taic a thoirt dhan athchuinge, gheibhear an teacsa an seo.

Agus faodaidh tu d’ainm a chur ris aig: https://www.surveymonkey.co.uk/r/HB86NRP

Dèan e!

Alasdair