Thàinig deagh naidheachd a-mach an-dè bho Riaghaltas na h-Alba gu bheil loidhne Inbhir Lìobhann ann am Fìobh gu bhith air ath-fhosgladh.
‘S e naidheachd mhòr a tha seo.
Tha grunn rathaidean-iarainn ùra air fhosgladh ann an Alba sna beagan bhliadhnaichean mu dheireadh – Allmhagh, Àrd Ruigh-Bathgate agus Rathad-iarainn na Crìochan. Ach ged nach fhada bho dh’fhosgail iad, tha bliadhnaichean mòra ann bho chaidh an coimiseanadh agus cha deach rathad-iarrainn sam bith aontachadh bho chionn còrr is dusan bliadhna. Agus cha deach rathad-iarann ùr sam bith aontachadh leis an riaghaltas làithearach – gus an t-seachdain seo.
Dhùin an stèisean do luchd-siubhail ann an 1969 ach bha an loidhne fosgailte airson bathair gu tòiseach nan 2000an. Dhùin an loidhne uile gu lèir ann an 2001 ach tha beagan air ath-fhosgladh eadar Ceann-rèile Thornton agus mèinn guail ann an Earlseat.
Bha iomairt ann sna 1990an gus an loidhne ath-fhosgladh ach deach leotha aig an àm. Thòisich cùisean a-rithist anns na 2010an le buidheann coimhearsnachd Levenmouth Rail Campaign a rinn iomairt làidir le taic bhon Chomhairle agus luchd-poileataigs ionadail bho gach pàrtaidh.
Tha an loidhne gu bhith fosgladh a-rithist ann an còig bliadhna.
Bha an loidhne seo na pàirt de loidhne Costa Fhìobha eadar Ceann-rèile Thornton agus Luacharas (Leuchars) taobh an East Neuk agus Chìll Rìmhinn.
Seo an rathad-iarainn mar a bha e. Ged nach eil cus coltas gun tèid an loidhne air fad ath-fhosgladh, dh’fhaodte gun faic sinn trèanaichean air ceann a tuath na loidhne a-rithist ann am beagan bhliadhnaichean. Tha iomairt làidir ann – Starlink – gus an rathad-iarainn bho Luachras gu Cill Rìmhinn ath-fhosgladh agus tha mi an dùil is an dòchas gun tèid leotha.
Alasdair
Trèanaichean, tramaichean is tràilidhean 