Nuair a bha mi na b’ òige, cha robh ùidh sam bith agam ann am meanbh rathaidean-iarainn. “Cha chanainn rathad-iarainn ri sin”, bhithinn ag ràdh.
Mar inbheach, ge-tà, tha mi air fàs glè dhèidheil air na rathaidean-iarainn beaga.
Pàirc Vogrie, Meadhan Lodainn.
Carson?
Sa chiad dol a-mach, tha cuid aca gu math fada agus a’ toirt seachad seirbheis còmhdhail phoblach cheart mar an Ravenglass & Eskdale ann an Cumbria. Is e fìor rathaidean-iarainn a th’ annta.
Ravenglass & Eskdale, Sgìre nan Loch, Cumbria.
A bharrachd air seo, às dèidh Beeching (Tuiteam gun Èirigh air is Leac air a Bheul), tha tòrr cloinne ann nach eil a’ fuireach faisg air loidhne rèile is nach robh riamh air bòrd trèana. Le meanbh-rathaidean iarainn, gheibh iad cothrom a dhol air trèana, cuid aca airson a’ chiad turais riamh agus tha fios gun dèan seo feum air choireigin gus còmhdhail rèile a bhrosnachadh.
Ach ’s e an adhbhar as cudromaiche gu bheil meanbh rathaidean-iarainn a’ còrdadh rium a chionn ’s gu bheil cothrom agad suidhe ann an carbadan fosgailte, agus cothrom agad a h-uile rud fhaicinn is a chluinntinn is a’ ghaoth a’ dol tro d’fhalt. Tha seo math oir tha cuid de na trèanaichean gu math luath (m.e Rathad-iarainn Kerr’s, Obar Bhrothaig; Ravenglass & Eskdale) agus cuid eile gu math cugallach (Pàirce Barshaw, Pàislig; Valley International Park, Crossford, Schd Lannraig) is mar sin, tha beagan cunnart ann, rud nach fhaigh thu gu tric air na rathaidean-iarainn mòra san latha a th’ ann.
Cugallach: Meanbh-rèile Pàirc Barshaw, Pàislig
Alasdair
Trèanaichean, tramaichean is tràilidhean 